बुटवलको मेयरका लागि कांग्रेसबाट खेलराज पाण्डेको नाममात्र सिफारिस

By स्थानीय पत्र Last updated Apr 19, 2022

सत्तारूढ पाँच दलीय गठबन्धनको भागबण्डापछि नेपाली कांग्रेसको भागमा परेको बुटवल उपमहानगरपालिकाको मेयरमा नेपाली कांग्रेसले खेलराज पाण्डेलाई उठाउने निर्णय गरेको छ।

सोमबार बसेको बुटवल उपमहानगर कमिटीको बैठकले नगरप्रमुखको उम्मेदवारको लागि नेपाली कांग्रेस बुटवल नगर सभापति समेत रहेका पाण्डेको मात्रै नाम सिफारिस गरेको हो।

यसअघि बुटवलको प्रमुखको लागि पाण्डेसहित क्षेत्रीय सभापति हरी लम्साल, महाधिवेशन प्रतिनिधि चुन्न प्रसाद पौडेलसहितले आकांक्षा देखाएका थिए।

नगर प्रमुखमा सिफारिस गरिएका पाण्डे २०७४ सालमा भएको पहिलो स्थानीय तहको निर्वाचनमा नेपाली कांग्रेसबाट उम्मेदवार भई पराजित भएका थिए।

एमालेका शिवराज सुवेदीले २३ हजार २ सय ४९ मत पाउँदा माओवादी र राष्ट्रिय जनमुक्ति पार्टीसँगको गठबन्धनका उम्मेदवार पाण्डेले २० हजार ८ सय ५१ मत पाएर पराजित भएका थिए।

नगर प्रमुखमा पराजित भए पनि निर्वाचित भएका सुवेदीलाई टिका र माला लगाइदिएर सफल कार्यको शुभकामना दिएपछि पाण्डेले एकाएक चर्चा कमाएका थिए।

यस्तै, गठबन्धनको भागबण्डापछि उपप्रमुख पद नेकपा एकिकृत समाजवादीको भागमा परेपनि नेपाली कांग्रेसबाट पनि आठ जनाको नाम सिफारिस गरिएको छ।

नेपाली कांग्रेस बुटवल उपमहानगर समितिका सचिव छाया पोखरेलले नगर प्रमुखमा पाण्डेको नाम सर्वसम्मत् रूपमा सिफारिस गरिए पनि उपप्रमुखमा ८ जनाको सिफारिस गरिएको बताए।

उपमहानगरभित्रका १९ वटै वडा सभापति सहितको बैठकले नगर उपप्रमुखमा रिजन श्रेष्ठ, सावित्रा टण्डन, जमुना ढकाल, रिता सेन, रिता केसी, गंगा पन्थी, राधा ज्ञवाली र सबिता शाक्यको नाम सिफारिस गरेको बैठकमा सहभागी एक वडा कमिटी सभापतिले जानकारी दिए।

नगरसमितिले सिफारिस गरि पठाएको नामलाई जिल्ला कार्यसमितिले अनुमोदन गरेपछि बुटवलको उम्मेदवारहरूको अन्तिम टुंगो लाग्ने छ। जिल्ला कार्यसमितिको बैठक मंगलबार भैरहवामा बसिरहेको नेपाली कांग्रेसले जनाएको छ।

त्यसैगरी रूपन्देहीको सिद्धार्थनगर नगरपालिकामा पनि नेपाली कांग्रेसले सर्वसम्मत् रूपमा नगरप्रमुखको उम्मेदवारको टुंगो लगाएको छ।

सिद्धार्थनगर नगरपालिकाको प्रमुखमा मोहम्मद इस्तियाक खानलाई उम्मेदवार बनाउने निर्णय गरेको छ।

खान संविधान सभा सदस्य समेत रहिसकेका छन्। सिद्धार्थनगर नगरपालिकाको प्रमुख पनि पाँच दलीय गठबन्धनमा नेपाली कांग्रेसको भागमा परेको हो।

कांग्रेस सिद्धार्थनगर समितिका सभापति कोशिसबहादुर खड्काले जनभावना अनुरूप खानलाई पार्टीले उम्मेदवार बनाउने निर्णय गरेको बताए। setopati