बेहडाबाबा धाममा रहेको शिव ज्योतिर्लिङ्गको उचाई नजानिदो किसिमले बढ्ने जनिविश्वास रहेको छ। मन्दिर दर्शन गरेमा भगवान भोलेनाथको कृपाले मनले चिताएको पूरा हुने विश्वासका कारण भारतीय भक्तजन अहले पनि पैदल हिँडेर बेहडाबाबा मन्दिरको दर्शन गर्न आउने गरेको मेलामा भेटिएका रामसेवक रानाले बताए। ‘बेहडाबाबाको दर्शन गरेमा मागेको कुरा पूरा हुने विश्वास छ’ उनले भने, ‘त्यसैले पहिलेका ग्वाला जस्तै अहिले पनि भारतीय भक्तजन पैदल हिँडेर दर्शन गर्न आउने गरेका छन्।’

बेहडाबाबा धामको वृहत्तर विकास गर्न गुरूयोजना बनेको मन्दिर व्यवस्थापन समितिले बताएको छ। धाममा भगवान शिवको मुख्य मन्दिरसहित गणेश, नवदुर्गा, राधाकृष्ण, हनुमान, शनिदेव, १६ कोठाको धर्मशाला निर्माण भइसकेको छ भने ५ मध्ये २ अग्निकुण्ड, ३ वटा वाटिका समेत निर्माण भइसकेको छ। मन्दिरमा १ सय ८ गौमुखी धारा बनाउन टेण्डर भइसकेको व्यवस्थापन समितले जनाएको छ। धनगढी उपमहानगरपालिकामार्फत आएको ५ करोड बजेटमा मन्दिर परिसरमा विभिन्न काम भइरहेको छ तर मन्दिरसम्म आउने सबैभन्दा छोटो सडक र शिवगंगा नदीमा पुल नबन्दा समस्या हुने गरेको मन्दिर व्यवस्थापन समितिका कोषाध्यक्ष रामबहादुर शाहीले बताए। ‘धनगढीबाट बेहडाबाबा आउने सबैभन्दा छोटो बाटो जाखोरबाबा ताल भएर आउने सडक हो। त्यो सडक र शिवगंगा नदीमा पुल बन्न सके धाममा आउन भक्तजनहरूलाई सजिलो हुने थिए’ उनले भने।

नित्य षोडशोपचारले शिव ज्योतिर्लिङ्गको पूजा हुने गरेको बेहडाबाबा मन्दिरको दक्षिणतर्फ ९ हेक्टर क्षेत्रमा फैलिएको महादेवा ताल रहेको छ। महादेवा तालको बीचभागमा गंगामाताको मन्दिर छ। उहिल्यै मन्दिरमा चढाउन जल त्यहीँ तलाउबाट लग्ने गरेको बताइएको छ। तालको संरक्षण र विकासका लागि काम भइरेहेको व्यवस्थापन समितिले बताएको छ। विगतभन्दा अहिले मन्दिरको प्रचारप्रसार र विकास धेरै भएको बडा नम्बर १६ का अध्यक्ष लक्ष्मीनारायण चौधरीको दाबी छ। उनले भने, ‘पहिलेको भन्दा अहिले मन्दिरको विकास र प्रचार धेरैं भएको छ। अहिले दैनिक विधि विधान अनुसार पूजा गरिन्छ भने साउन महिनाभर विशेष पूजा हुने गरेको छ।’

बेहडाबाबा धाम दर्शन गर्न अहिले पनि भारतको उत्तर प्रदेशबाट श्रद्धालु भक्तजन पैदल नै हिँडेर आउने गर्छन्। राणाकालभन्दा पहिले भारतीय ग्वालाहरूले ज्योतिर्लिङ्ग लग्ने भनेर खनेर हेर्दा फेदको अन्त्य नभेट्टाएको जनश्रुति छ। बेहडाबाबाबाट लगेको सानो ढुङ्गा भारतको गोला भन्ने ठाउँमा बेहडाबाबा मन्दिर बनाइएको छ भने, बेहडाबाबा धाममा शिवरात्री, वालाचतुर्दशी, गंगादशहरा, साउन र चैत महिनाभर भक्तजनको घुँइचो लाग्ने गरेको छ।dineshkhabar