बुटवल । उच्च ज्वरो आउँदा समेत उपचार नगराई पढाईमै लगाएपछि रूपन्देहीको तिलोत्तमा नगरपालिका नयाँमिलस्थित प्यारामाउन्ट बोर्डिङ स्कूलमा पढ्ने एक छात्राको शनिवार मृत्यु भएको छ ।
विद्यालयको छात्राबासमा बसेर १० कक्षामा अध्ययनरत १५ वर्षीया छात्रा प्रतिमा सापकोटाको विगत २ दिन देखि उच्च ज्वरो आएपनि समयमा विद्यालयले उपचार गराउन ध्यान नदिँदा उनको मृत्यु भएको हो । विद्यालयमा अध्ययनरत छात्रा सापकोटाको अभिभावकले उपचारका लागि लैजाँदै गर्दा मृत्यु भएको विद्यालयका सहप्राचार्य लिलाधर किराँतले पुष्छि गरेका छन् ।।
बालिकामा २ दिनदेखि ज्वरो र श्वासप्रश्वासमा समस्या देखिएपनि विद्यालयले बालिका गम्भिर भएपछि मात्र आज अभिभावकलाई खबर गरेका थिए । बालिका बढी बिरामी भएपछि विद्यालयले शनिवार बिहान अभिभावकलाई बोलाएर जिम्मा लगाएको थियो ।
बालिकालाई नजिकैको क्रिमसन अस्पतालमा लैजाँदै गर्दा मृत्यु भएको थियो । अस्पताल पुगेलगत्तै अस्पतालका चिकित्सकले मृत्यु घोषणा गरिदिएको मृतक बालिकाका आफन्त भाष्कर भण्डारीले खबरकुरालाई जानकारी दिए ।
सरकारले जाखिम उठाएर अध्ययन अध्यापन नगराउन भनेपनि प्यारामाउण्ट विद्यालयमा भने अहिले परीक्षा चलिरहेको छ । गुल्मीको मजुवा घर भएकी उनी तिलोत्तमाको नयाँमिलमा आफन्तको सम्पर्कमा रहेर विद्यालयमा अध्ययनरत थिइन् ।
सापकोटाको मृत्यु भएको खबर आएसँग विद्यालयले धमाधम् अभिभावक बोलाउँदै विद्यार्थी जिम्मा लगाउन सुरु गरेपछि अभिभावकहरुले स्वास्थ्यमा समस्या आएका विद्यार्थीहरुको पीसीआर परीक्षणको माग गरेका थिए । मृतक सापकोटा सहित विदालयमा अध्ययनरत धेरै विद्यार्थीहरुलाई रुघा, खोकी र ज्वरो आएपनि विद्यालयले पढाउँदै आएको थियो । अभिभावक र विद्यार्थीहरुको दवावपछि भने विद्यालयले होस्टेलमा रहेका विद्यार्थीहरुको पीसीआर परिक्षणका लागि स्वाव संकलन गराएको छ ।
सुरुमा मृत्युको पुष्टि गरेका विद्यालयका भाईस प्रिन्सिपल किराँतले केहिबेरपछि घटनाको बिषयमा बुझ्न फोन गर्दा मोबाईल स्विचअफ गरेका छन् ।
मृतक सापकोटाका नाताले दाई पर्ने भास्कर भण्डारीले महामारीकाबेला २ दिन देखि ज्वरो आएको विद्यार्थीलाई किन स्वास्थ्य परिक्षण गरिएन ? भनेर प्रश्न गरेका छन् । उनले सरकारले बन्द गर्न आग्रह गर्दा पनि विद्यालयय बन्द नगर्ने, होस्टेलमा रहेका विद्यार्थीको ज्वरो आउँदा समेत स्वास्थ्य परिक्षण नगर्ने, सिकिस्त भएपछि अभिभावकको जिम्मा लगाउने विद्यालयको कार्य निन्दनिय रहेको बताए । उनले बिद्यालयको शिक्षकलाई कोरोना संक्रमण पुष्टि भएपछि उनको सम्पर्कमा रहेका विद्यार्थीहरुलाई निगरानी राख्नु पर्नेमा बेवास्ता गरेको आरोप लगाए ।
विद्यालयकै कारण आफ्नो बहिनीको ज्यान गएको भन्दै भण्डारीले यस्ता विद्यालयको दर्ता खारेज हुनु पर्ने माग गरे ।
मृतक सापकोटा सहित अन्य ज्वरो आएका विद्यार्थीहरुको पनि स्वाव संकलन गरिएको छ । स्वावको पीसीआर रिपोर्ट भने साँझ वा भोलीमात्र आउने छ ।
विद्यार्थीको मृत्यु हुनुका साथै धेरै विद्यार्थीलाई उच्च ज्वरो आउँदा पनि विद्यालयले बेवास्ता गरेको भन्दै केहि विद्यालयका विद्यार्थी र तीनका अभिभावकले विद्यालय घेराउ गर्दै नाराबाजी समेत गरेका थिए ।Khaber kura