घोषणा पत्रसहित निर्वाचनमा होमिएका प्रमुख र उपप्रमुखले जनअपेक्षा अनुसार काम गर्न नसकेको नगर कार्यपालिका सदस्य भक्तबहादुर विश्वकर्माले बताए। ‘जनताको पक्षामा केही काम भएको छैन। मेयर, उपमेयरले व्यक्तिगत फाइदा लिएका छन्’ उनले भने, ‘नगरपालिका एमालेका कार्यकर्ता भर्ति केन्द्र मात्रै भएको छ। दुई बढी कार्यकर्ताले रोजगारी पाएका छन।’

अधिकार सम्पन्न स्थानीय तहले जनताबाट निर्वाचित जनप्रतिनिधि पाएको पनि पाँच वर्ष हुन लाग्यो। तर यो अवधिमा निर्वाचित प्रतिनिधिले जनताको अपेक्षाअनुसार काम गर्न नसकेको गुनासो बढ्दो छ। गौरीगंगमा निर्वाचित जनप्रतिनिधिले चुनावको समयमा नगरपालिकामा रिङरोड निर्माण गर्ने, कृषिमा क्रान्ति गर्ने, खानेपानीको व्यवस्था गर्ने, सुशासन कायम गर्ने, नगरपालिकमा पर्ने पर्यटकीय क्षेत्रको विकास गर्ने, स्थानीय स्रोतलाई पहिचान गरी सुदृढ नगर बनाउने घोषणा गरेका थिए। तर यी नाराहरु कागजमा सिमित भएको गौरीगंगा नगरको प्रमुखमा पराजित भएका नेपाली काँग्रेसका नेता दिनेशराज जोशीले बताए। ‘एमालेको घोषणापत्र अनुसार केही पनि भएको देखिन्न। यो अहिलेको नेतृत्वको असफलता हो’ उनले भने।

शिक्षा, स्वास्थ्यमा पनि नगरपालिकाका प्रमुख÷उपप्रमुखले जनअपेक्षाअनुसार काम गर्न नसकेको देखिएको छ। नगरपालिकामा पर्ने विभिन्न नदीहरुको दोहन गरी उल्टै लाखौं रकम अनियमितता गरेको आरोप लागेको छ। अहिलेको नेतृत्वकै कारण नगरको विकास अझै पछाडि धकेलिएको धारणा धेरैको छ। अन्य जनप्रतिनिधिको असहमति हुँदा पनि कर्मचार भर्ना गर्दा बद्मासी भएको छ। प्रक्रियाविपरीत नगरपालिकामा एमालेका कार्यकर्तालाई रोजगारी दिएको देखिएको छ। विकास बजेटलाई पनि पारदर्शी रुपमा उपयोग गर्न सकिएको छैन। जसकाकारण आम नागरिकलाई स्थानीय सरकारको अनुभूति नै नभएको भनाई धेरैको छ।