एमसीसीबारे अब वार कि पार गरौं भन्ने नै हो : गगन थापा

By स्थानीय पत्र On Feb 18, 2022

पुष्पकमल दाहाल ‘प्रचण्ड’ प्रधानमन्त्री हुँदा एमसीसी परियोजना स्वीकृत गरिएको र केपी शर्मा ओली प्रधानमन्त्री हुँदा यसलाई अघि बढाइएको उल्लेख गर्दै थापाले त्यसपछि बल्ल यो सम्झौताका केही बुँदा संशोधन गर्नुपर्छ भन्ने कुरा आएको जनाए ।

तर, उक्त सम्झौता नेपालले मात्र चाहेर संशोधन नहुने अवस्था रहेकाले यसका लागि विवादित भनिएका केही बुँदामा स्पष्टिकरण सोधिएको पनि उनले प्रस्ट पारे । उक्त स्पष्टिकरण र अमेरिकी जवाफसहितलाई संसदमा ल्याएर छलफल गर्न सरकार तयार रहेको उनले बताए ।

एमसीसीलाई अब धेरै समय अल्झाएर राख्न नहुने उल्लेख गर्दै थापाले भने, ‘पास भए पास, फेल भए फेल होस्, कति दिन छलफल गर्नुपर्छ, गरौं । यही कुरा प्रधानमन्त्रीले प्रमुख प्रतिपक्षी दलका नेतालाई समेत भन्नुभएको छ ।’

प्रधानमन्त्री देउवाले यो विषयमा आफ्नो पोजिसन क्लियर गरिदिनुस् भनेर एमाले अध्यक्ष ओलीलाई भनेको तर आफ्नै नेतृत्वको सरकारले प्रक्रिया अघि बढाउने निर्णय गरेको अवस्थामा समेत ओलीले अहिले मौनता साँधेर बसेकोमा आफूहरुलाई आश्चर्य लागेको थापाले बताए ।

थापाले एमसीसीकै कारण गठबन्धन भत्किनुपर्ने कारण नरहेको पनि प्रस्ट पारे । उनले भने, ‘गठबन्धन किन बन्यो ? हाम्रो बीचमा कुराकानी मिलेर बनेको । कुराकानी मिलेन भने गठबन्धन चल्दैन । फरक फरक दल भएका कारणले गठबन्धन हुन केही कुरामा कुराकानी मिल्नुपर्छ । हामी सँगै हिँड्नका लागि गठबन्धन बनेको हो । कुनै एउटा विषयका लागि बनेको होइन, एउटा विषयका कारण भत्किनु पर्छ भन्ने पनि होइन ।’

एमसीसीको सवालमा पक्षमा मतदान गर्ने कि विपक्षमा मतदान गर्ने भन्नेमा प्रत्येक दल स्वतन्त्र हुने उनले बताए । ‘अब यसलाई वार कि पार गरौं भन्ने हो । दर्जनौं पटक हामी छलफलमा सँगै बस्यौँ । संशोधन गर्ने ठाउँ नभइसकेपछि केही विषयमा प्रस्ट पार्न स्पष्टिकरण सोध्यौं । अझ पनि अहिले टेबल नगरौं, एक दुई महिना पर सारौं भन्ने कुरा आइरहेको छ,’ उनले भने, ‘यो विषय काँग्रेसको मात्र जिम्मेवारी हो भन्नेजस्तो कुरा भइरहेको छ । सबै जना पन्छिएर काँग्रेसको मात्र जिम्मेवारीको कुरा हो भनेर पन्छिएकोमा हाम्रो आपत्ति छ ।’ratopati