एमसिसी धाकधम्की दिएर पास हुन्न: झलनाथ खनाल

By स्थानीय पत्र On Feb 16, 2022

नेकपा (एकीकृत समाजवादी) का सम्मानित नेता झलनाथ खनालले एमसिसीलाई जबरजस्ती ठेलेर पास गर्न नहुने बताएका छन्।

बुधबार बसेको प्रतिनिधि सभाको बैठकपछि पत्रकारसँग बोल्दै उनले सहमति नभइकन जबरजस्ती बल प्रयोग गरी एमसिसी पास गर्न नहुने बताएका हुन्।

सहमति नजुटाइ धाकधम्की दिएर एमसिसी पास गर्न नहुने उनले भनेका छन्।

‘यो लोकतन्त्रमा अनेकौं विषयमा बहस हुन्छ। विवाद हुन्छ र कतिपय कुराहरू मिल्दैन। ती नमिलेका कुराहरूमा जबरजस्ती ठेल्न खोज्न पनि हुन्न। कतिपय विषयहरू १० औं वर्ष लगाएर मात्रै हुन्छन्,’ उनले भने, ‘कतिपय विषय परिमार्जन हुन्छ, परिस्कृत हुन्छ, बदलिन्छन्, संशोधन हुन्छ, अनिमात्र सहमति हुन्छ। अब सहमतिको विषयमा बल प्रयोग गरेर हुन्छ? धाकधम्की दिएर हुन्छ? हुँदैन।’

बुधबार दिउँसो बसेको प्रतिनिधि सभाको बैठक शोक प्रस्ताव पारित गरेपछि स्थगित भएको छ। अर्को प्रतिनिधि सभाको बैठक शुक्रबार बस्नेछ।setopati