नवलपरासी २१ असोज –
पश्चिम नवलपरासीको पाल्हीनन्दन गाउपालिकाका अध्यक्ष बैजु प्रसाद गुप्ता (दिपक) माथि एकलौटी गरेको आरोप लगाउदैं उपाध्यक्ष पावित्री कोहारसहितको नेतृत्वमा ज्ञापनपत्र बुझाइएको छ । मंगलवार गाउपालिकामा उपाध्यक्ष कोहार र ४ जना वडाध्यक्ष एवं ३ जना कार्यपालिका सदस्य सहितको टोलीले पालिका अध्यक्ष गुप्ताले एकलौटी गरेको आरोप लगाउदैं प्रमुख प्रशासकीय अधिकृत दिनेश कोहाँरमार्फत ज्ञापनपत्र बुझाएका हुन् ।
उनीहरुले विगत २ महिना देखि कार्यपालिका बैठक नराखेको पालिकाका कर्मचारीलाई अनुचित दबाब र प्रभावमा राखेको , कर्मचारी आफू अनुकूल परिचालन गरेको भन्दै काम गर्ने राम्रो वातावरण सिर्जना गर्न माग सहित ज्ञापनपत्र बुझाएका छन् । ज्ञापनपत्रमा हालसम्म बजेट तथा नीति कार्यक्रमको पुस्तिका प्रकाशन नगरेको व्यक्तिगत स्वार्थ पूर्तिका लागि सभाबाट पारित बजेट व्यापक हेरफेर गरेको लगायतका आरोप लगाइएको छ । ज्ञापनपत्रमा उल्लेख भए अनुसार पालिका अध्यक्षको निर्देशनमा प्रमुख प्रशासकीय अधिकृतले लेखा अधिकृतले सरुवा हुदाँ समेत रमाना नदिएको लगायतका बिषय उल्लेख गरिएको छ । त्यस्तै प्रमुख प्रशासकीय अधिकृत दिनेश कोहाँरले उपाध्यक्षको नेतृत्वमा ज्ञापन पत्र आएको जानकारी दिनुभयो ।
