नवलपरासी – नेकपा (क्रान्तिकारी माओवादी) बर्दघाट नगर समितिको नयाँ नेतृत्व चयन गरिएको छ । आइतवार नगर भेला तथा सांस्कृतिक प्रतिरोध दिवस कार्यक्रम आयोजना गरेर ज्ञान बहादुर केसीको नेतृत्वमा १३ सदस्यीय नगर समिति चयन गरिएको हो । समितिको सेक्रेटरीमा के.सी त्यस्तै नगर सदस्यहरुमा मेखनारायण चौधरी, खेम गुरुङ्ग, बिजय गुरुङ्ग, सुजन रोक्का , गोपाल गिरी,गौरी पोखरेल , दीपा पाण्डे, अमिना पठान, टिका दमाईलगायत रहनुभएको थियो ।
कार्यक्रममा नेकपा(क्रान्तिकारी माओवादी) केन्द्रीय सल्लाहकार तथा जिल्ला ईञ्चार्ज क्षेत्रबहादुर थापा क्षेत्री , क्रान्तिकारी पत्रकार महासंघका महासचिव रवि पाण्डेय, थारु राष्ट्रिय मुक्ति मोर्चाका महासचिव दुर्गा नारायण चौधरी, अखिल नेपाल महिला संघ (क्रान्तिकारी)जिल्ला संयोजक मुक्तमाया महतोलगायतले शुभकामना दिनुभएको थियो । कार्यक्रममा अखिल नेपाल लेखक संघका केन्द्रीय सदस्य तथा पार्टीका जिल्ला सल्लाहकार बाबुराम मुसाफिरले प्रगतिवादी कविता समेत बाचन गर्नुभएको थियो ।
कार्यक्रम पार्टीका जिल्ला सचिवालय सदस्य तथा नगर सेक्रेटरी रामचन्द्र पोखरेलको अध्यक्षतामा भएको थियो । कार्यक्रममा पार्टीनिकट बिभिन्न जनबर्गीय मोर्चा संगठनका नेता कार्यकर्ताहरुको उपस्थिति रहेको थियो ।