नवलपरासी – बर्दघाट नगरपालिकाको सहयोग र सहयोगी महिला समाज नेपालको समन्वयमा ६ दिने तालिम बर्दघाट १ माकरमा संचालित छ । बर्तमान अवस्थामा किशोरीहरुका समस्या र समाधानका उपायहरु बारे विश्वब्यापी बहस चल्दै आएको छ । किशोरीहरु माथि हुने गरेका हिंसा जस्ता जघन्य अपराध र आत्महत्या जस्ता बिषयले समेत उनीहरु माथि चुनौती थपिएको छ ।
यही समस्याहरुमा केन्द्रित रहेर नगर भित्र रहेका कक्षा १२ सम्म अध्ययन हुने नीजि तथा सामुदायिक बिद्यालयका किशोरीहरुलाई मनोपरार्मशको तालिम संचालन हुदै आएको छ । उक्त तालिममा मनोपरार्मशदाता खीमा रिजाल, तारा सापकोटा लगायतका सहजकर्ताहरुले सहजीकरण गरिरहनुभएको छ ।
हाम्रो देशको सन्र्दभमा तालिम देखि तालिम सम्मका कार्यक्रम गर्ने र बजेट सक्ने हुदै आएको र तालिमले परिणाम दिन नसकेको भन्ने कतिपय तर्कहरु पनि आउने गरेका छन् । यही बिषयमा आज हाम्रो सहकर्मी लक्ष्मी घिमिरेले उक्त तालिममा सहभागी किशोरीहरुलाई तपाईलाई यो तालिम कस्तो लाग्यो ? भन्ने प्रश्न गर्नुभएको छ ।
“यो हाम्रा लागि धेरै महत्वपुर्ण रहेछ”
ग्रीष्मा पौडेल
एकदमै राम्रो लाग्यो । यो तीन दिनको समय आज हाम्रो अन्तिम दिन थियो । शुक्रवारबाट तीन दिन हामीले यो तालिम लिइरहेका छौ । हामीलाई यो तालिमको समय निकै छोटो लाग्यो । अझै पनि मिल्छ भने नगरपालिकाले हामीलाई यस्ता तालिममा अझै समय देओस् । धेरै कुरा सिक्न बाँकी नै रह्यो । यो हाम्रा लागि धेरै महत्वपुर्ण रहेछ ।
“धेरै राम्रो सुचनाहरु हामीले तालिमबाट पायौ”
कुशुम पौडेल
म कक्षा १२ मा पढ्छु । यो तालिम हाम्रो लागि धेरै नै महत्वपुर्ण छ । यो उमेरमा हाम्रोलाई निकै क्रिटिकल उमेर हो । हाम्रो उमेरमा धेरै बिभिन्न किसिमका भावना आउछन् । त्यसले तनाब पनि दिने गर्छ । हामीले आत्महत्या जस्ता निर्णय गर्न खोज्छौ । यस तालिमले हामीलाई त्यस्ता समस्या बाट बचाउँछ । धेरै राम्रो सुचनाहरु हामीले तालिमबाट पायौ । अरु साथीहरुका लागि समेत नगरपालिकाले यस्तो तालिमको ब्यवस्था गर्नुपर्छ ।
“हाम्रा भाई बहिनीहरुलाई यो तालिम निकै खाँचो छ”
रोशनी सुनार
यो तालिम मलाई एकदम राम्रो लाग्यो । सायद यो तालिम हामीले पहिल्यै पाएको भए पहिल्यै धेरै सिक्न सक्ने रहेछौ । म चाहन्छु कि यो तालिम हाम्रा घरका भाइ बहिनीहरु र दिदीहरुलाई आवश्यक छ । हामी कहाँ यस्ता घटना घटिरहेको छ । हाम्रा भाई बहिनीहरुलाई यो तालिम निकै खाँचो छ । उनीहरुले पहिल्यैबाट आफ्नो सुरक्षा गर्न सक्ने होउन् । यसमा ढिलाई गर्नु हुदैन ।
“किशोरहरुका लागि पनि यो तालिम संचालन गर्नुपर्छ ”
जस्मिन न्यौपाने
किशोरी सुरक्षा सम्बन्धि यो तालिम निकै राम्रो लाग्यो । समय अलि छोटो भयो । वास्तविक जीवनमा भोगेका कुराहरु माथिल्लो उमेरमा आएपछि भएपनि थाहा पायौं । सही र गलत छुटयाउन यो तालिम निकै आवश्यक रहेछ । अलि अघि नै सानो उमेरमा यस्तो शिक्षा पाएको भए अझ राम्रो हुन्थ्यो । किशोरीहरुलाई मात्र नभई किशोरहरुका लागि पनि यो तालिम संचालन गर्नुपर्छ । ताकि उनीहरुले पनि सिकुन् ।
“तालिम अलि छोटो भयो”
स्वेता विश्वकर्मा
यो तालिम मलाई धेरै नै राम्रो लाग्यो । हामीलाई प्रशिक्षक (खीमा रिजाल)ले पनि आफ्नो किम्ती समय दिनुभयो । हामीलाई धेरै कुरा सिकाउनु भयो । यो तालिममा समय अलि कम भयो अझै धेरै कुरा सिक्न पाँए अझ राम्रो हुन्थ्यो । म आफ्नो सम्पर्कमा भएका भाई बहिनीहरुलाई तालिममा सिकेका मनोपरार्मशका बिषयमा फैलाउनेछु ।
प्रस्तुति – लक्ष्मी घिमिरे