सेयर कारोबारको दोस्रो दिन मंगलबार नेप्से परिसूचक दोहोरो अंकले ओरालो लागेको छ।
नेप्से ३६.०८ अंकले घटेर १९९६.२५ विन्दुमा झरेको छ। यसदिन सेन्सेटिभ इन्डेक्स ६ अंक बढीले घटेर ३८३.५१ विन्दुमा पुगेको छ।
यसअघि कारोबारको पहिलो दिन सोमबार नेप्से १५.८२ अंकले घटेर २०३२.३४ विन्दुमा बन्द भएको थियो।
सो दिन २३० कम्पनीको २९ लाख २० हजार ७०५ कित्ता सेयर ९९ करोड ८६ लाख ७४ हजार २६२ रुपैयाँमा खरिदबिक्री भएको थियो।
आज २३२ कम्पनीको ४१ लाख ४७ हजार २५५ कित्ता सेयर १ अर्ब १८ करोड ५५ लाख ४६ हजार १७९ रुपैयाँमा खरिदबिक्री भयो।
यसदिन कुनै पनि कम्पनीको सेयरमा सकारात्मक सर्किट लागेन। हिमालयन पावरको ८.१८ प्रतिशतले सेयर मूल्य ओरालो लाग्यो।
कारोबारका आधारमा शिवम् सिमेन्ट अग्रस्थानमा रहयो। सो कम्पनीको ४ करोड ४७ लाख १८ हजार बढी मूल्यको सेयर कारोबार भयो। नेपाल क्रेडिड एन्ड कमर्सियल बैंक ३ करोड बढीको कारोबार गरी दोस्रो स्थानमा रहयो।
यसदिन कारोबारमा आएका १३ समूहको सूचक घट्यो। अदर्श समूहको ३.४४ प्रतिशतले सेयर मूल्य घट्दा ट्रेडिङको ३.१२ प्रतिशतले घट्यो। यस्तै डेभलपमेन्ट बैंक, हाइड्रो पावर, फाइनान्स, नन लाइफ इन्सुरेन्सको सेयर मूल्य २ प्रतिशत बढीले घट्यो भने होटल्स एन्ड टेरिजम,मनु एन्ड प्रो, माइक्रो फाइनान्स,लाइफ इन्सुरेन्स र इन्भेस्टमेन्ट समूहको सेयर मूल्य १ प्रतिशत बढीले ओरालो लाग्यो। annapurnapost