एमसिसीमाथि थप राजनीति गर्नु जटिलतालाई बल्झाउनु हो: विवेकशील साझा

By स्थानीय पत्र Last updated Feb 28, 2022

विवेकशील साझा पार्टीले एमसिसीमा थप राजनीति गरे नेपालको भू-राजनीतिक जटिलता अझ बल्झन सक्ने बताएको छ।

आज पार्टीका प्रवक्ता शरदराज पाठकले विज्ञप्ति जारी गर्दै अबका दिनमा एमसिसीमाथि थप राजनीति गर्न नहुने उल्लेख छ।

‘अबका दिनहरूमा एमसीसीमाथि थप राजनीति गर्नु भनेको बढ्दो रूपमा संवेदनशील बन्दै गएको नेपालको भूराजनीतिक जटिलतालाई अझ बल्झाउनु हो, त्यस्तो काम अब कसैबाट पनि हुनु हुँदैन,’ विज्ञप्तिमा उल्लेख छ।

एमसीसीलाई गिजोलेर चरम सत्ता दाउपेचको विषय बनाउँदै अन्ततः कुनै संवैधानिक तथा कानुनी हैसियत नहुने व्याख्यात्मक टिप्पणीको लेपन लगाएर अनुमोदन गरिएबाट नेपाली राजनीति कति रसातलमा बहिरहेको छ भन्ने प्रस्ट भएकोसमेत विवेकशील साझाले बताएको छ।

‘विगतमा बारम्बार जसरी राष्ट्र हितलाई मध्यनजर राखेर होइन, निहित राजनीतिक स्वार्थहरूका कारण कयौँ गम्भीर निर्णयहरू लिइएका छन्, त्यसै गरी एमसीसी पनि निहित राजनीतिक स्वार्थहरूका कारण नै पारित भएको छ। संसद्मा देशको हितबारेको बहस गौण हुनु र सत्ता समीकरण प्रधान हुनु अत्यन्तै चिन्ता र खेदजनक विषय हो,’ पाठकले जारी गरेको विज्ञप्तिमा उल्लेख छ।

सत्ता गठबन्धन र प्रतिपक्षी दलको अपरिपक्व र गैह्रजिम्मेवारीपूर्ण शैलीले चीन र अमेरिकाको अस्वाभाविक सक्रियता बढेर एमसीसी पेचिलो भू-राजनीतिक मुद्दा बन्न पुग्नु देशका लागि शुभ संकेत नहुने पनि विज्ञप्तिमा उल्लेख छ।

‘एमसीसी सम्झौतामाथि हालैका वर्षमा जे जति बहस र राजनीति भए, त्यसले भविष्यमा विदेशी ऋण-अनुदान लिनु र सन्धि-सम्झौता हुनु पूर्व गरिनु पर्ने गृहकार्य र देखाउनु पर्ने सुझबुझलाई निर्देशित गर्न सक्यो भने त्यो देशका लागि फलदायी हुनेछ,’ विज्ञप्तिमा भनिएको छ।

आइतबार प्रतिनिधि सभा बैठकबाट एमसिसी अनुमोदन भएको थियो।setopati