उन्नत घाँसका बिउ पाएपछि कृषकहरु हर्षित

बर्दघाट नगरपालिकाको कार्यालयको स्विकृत कार्यक्रम अन्तरगत पशुपन्छी विकास शाखाले उन्नत घाँसका बिउ वितरण गरेको छ । हरियो घाँसमा आधारित पशुपालन प्रणाली अपनाउदाँ लागत मूल्य न्युन भई आम्दानी तथा बचतमा बृद्धि हुने भएकोले पालिकाले घाँसको बिउ बितरण गरेको हो । नगरले हिउदे जै तथा बर्षीम घाँसको बिउ वितरण कार्यक्रम सम्पन्न गरेको नगर प्रमुख धीरज शर्मा बस्यालले जानकारी दिनुभयो ।

पशु पालक कृषकहरुलाई ४० क्विन्टल जै घाँसको बिउ र १७ क्विन्टल ६० केजी बर्षिम घाँसको बिउ वितरण पशुपंन्छी विकास शाखाका प्रमुख भरत लम्सालले बताउनुभयो । पशुपालक कृषकहरुलाई ७५ प्रतिशत अनुदानमा घाँसको विउ वितरण गरिएको बर्दघाट नगरपालिकाले जनाएको छ । २५ प्रतिशत लागत सहभागितामा उन्नत घाँसका बिउ पाएपछि कृषकहरु हर्षित भएका थिए । कृषकहरुले धान काट्ने समय भइसकेकोले धान काटेपछिको खाली जग्गामा घाँस लगाउने भएकाले समयमै घाँसको विउ वितरण गरिएको हो । ७ लाख पचास हजार रुपैया बराबरको बिउ प्रदान गरिएको लम्सालले बताउनुभयो । घाँसमा आधारित पशु पाल्दा दुध तथा मासुजन्य पद्धार्थको लागत कम हुने र मुनाफा बृद्धि हुने उहाँको भनाई थियो । नगरमा १ सय ४२ वटा ब्यवसायिक गाई भैसीर तथा बाख्रा पालन फार्महरु दर्ता तथा सुचिकृत भएका छन । यस कार्यक्रम अन्तर्गत सबै व्यवसायिक फार्महरुलाई र अन्य कृषकहरु गरि जम्मा ७ सय २४ जना कृषकहरु लाभान्वित भएका छन् । “पारिवारिक पोषण रोजगारी र समृद्धि“ भन्ने नारा सहित कार्यक्रम गरिएको लम्सालले बताउनुभयो ।