संविधान दिवसको अवसरमा लुम्बिनी प्रदेशमा ६१ जनालाई विभिन्न पदक

By स्थानीय पत्र Last updated Sep 19, 2022

लुम्बिनी प्रदेश सरकारले विभिन्न क्षेत्रबाट मुलुकलाई योगदान पुर्‍याएको भन्दै ६१ जनालाई विभिन्न पदकबाट विभूषित गरेको छ।

सातौं संविधान दिवसको अवसरमा सोमबार बुटवलमा आयोजित विशेष समारोहमा प्रदेश पदकबाट विभूषित हुने व्यक्तिहरूको नामावली घोषणा गरिएको हो।

संघीयता र गणतन्त्रको स्थापनामा सहयोग पुर्‍याएको भन्दै रूपन्देहीका जनार्दन यादवलाई मरणोपरान्त र जनयुद्धका घाईते पाल्पाका जीत बहादुर थापालाई प्रदेश प्रमुख तृतीय जनसेवा पदक प्रदान गर्ने घोषणा गरिएको हो।

त्यसैगरि बाँकेका डा. मोहिउद्दिन किदवाई र चितवनका डा. राजन पाण्डेलाई मुख्यमन्त्री प्रज्ज्वलदीप पदक द्वितीय प्रदान गरिएको छ।

लुम्बिनी प्रदेशको स्वास्थ्य मन्त्रालयका सचिव डा. विकास देवकोटालाई प्रदेश सेवा समर्पण पदक प्रथम प्रदान गरिएको छ।

लुम्बिनी प्रदेश सरकारले प्रदेश सेवा समर्पण पदक द्वितीय ९ जनालाई, प्रदेश सेवा समर्पण पदक तृतीय एक जनालाई, उजिरसिंह दीप पदक द्वितीय ४ जनालाई र उजिरसिंह दीप पदक तृतीय चार जनालाई प्रदान गरेको छ।

त्यसैगरि समाजसेवा श्री पदक द्वितीयबाट ६ जना र समाजसेवा श्री पदक तृतीयबाट एक जनालाई विभूषित गरेको छ। त्यसैगरि प्रदेश रत्न पदक प्रथम दुई जनालाई, प्रदेश रत्न पदक द्वितीय १२ जनालाई, प्रदेश रत्न पदक तृतीय ६ जनालाई प्रदान गरेको छ।

त्यस्तै प्रजापति गौतम पदक द्वितीय र तृतीयबाट १/१ जना, दंगिशरण बलिहाङ पदक द्वितीयबाट एक जना तथा दंगिशरण बलिहाङ पदक तृतीयबाट ४ जना गरि ६१ जनालाई विभूषित गरिएको लुम्बिनी प्रदेशका आन्तरिक मामिला, कानुन तथा सञ्चार मन्त्रालयका सचिव कोमल प्रसाद धमलाले जानकारी दिए।

प्रदेश प्रमुख अमिक शेरचनको प्रमुख आतिथ्यतामा सम्पन्न भएको कार्यक्रममा बोल्दै लुम्बिनी प्रदेशका मुख्यमन्त्री कुल प्रसाद केशीले जनताले रगत र पसिना बगाउँदै ठूलो त्याग र बलिदानीबाट प्राप्त गरेको संविधान सातौं वर्षको रुपमा आईपुग्दा परिपक्व बन्दै गएको बताए।

उनले संविधानको रक्षा, कार्यान्वयन र सवलिकरणका लागि नयाँ प्रतिनिधिसभा र प्रदेशसभाले अझै भूमिका निर्वाह गर्नुपर्ने बताए। ‘संविधानको संस्थागत विकास, पूर्ण कार्यान्वयन र सवलिकरणका लागि आगामी निर्वाचन पछि स्थापना हुने प्रतिनिधिसभा र प्रदेशसभा सफल रहनेछन्,’ मुख्यमन्त्री केशीले भने।

मुख्यमन्त्री केशीले लुम्बिनी प्रदेश हिमाल, पहाड र तराईको समिश्रणसँगै भगवान गौतमबुद्धको जन्मभूमि समेत रहेकोले यो प्रदेश सौभाग्यशाली प्रदेशको रुपमा रहेको बताए।

उनले नेपालको लोकतान्त्रिक आन्दोलनमा सबैभन्दा बढी लुम्बिनी प्रदेशकै नागरिकले त्याग र बलिदानी गरेका कारण मुलुकको राजनीतिक परिवर्तनको सबैभन्दा ठूलो हकदार पनि लुम्बिनी प्रदेश रहेको दाबी गरे।

कार्यक्रम पूर्व बुटवलको राजमार्ग चौराहबाट बुटवल सभाहलसम्म विभिन्न झाँकी सहितको प्रभातफेरी निकालिएको थियो। setopati