संसदवादीहरु नेपाली काँग्रेस, एमाले, माओवादी केन्द्र, जसपा र एकीकृत समाजवादी मिलेर अमेरिकन मिलेनियम च्यालेन्स कम्प्याट संसदबाट पास गरे । उल्लेखित पार्टी मध्ये मौन समर्थन गर्ने एमाले पनि एमसीसीकै मतियार बन्यो । एमसीसी पास गरिए अमेरिकन सुरक्षा छाता भित्र नेपाल जान्छ र यो इन्डोप्यासेफिक रणनीतिको अंग हो । यस्तो राष्ट्रघात गर्नुहुदैन भनेर बिरोध गर्ने देशभक्त नागरिक, पार्टी,समुह र ब्यक्तिलाई संसदवादीहरुले त्यतिबेला निकै ललकारे । अनपढ गवार भने । अनेक मित्था प्रचार गरे । काँग्रेस महामन्त्री गगन थापाले त एमसीसीबाट अमेरिकी सेना आउदैन आए आफूलाई मुण्डन गरेर थानकोट कटाउन ऐलान गरे । अन्ततः त्यो सबै संसदवादीहरुले जनतालाई ढाँटेका थिए । यो उनीहरुको बर्ग चरित्र अनुरुपको कर्म थियो ।
अब राष्ट्रघाती एमसीसी सम्झौतापछि अमेरिकाले नेपालमा अपराधीसेना ल्याउन नेपाली सेनासँग स्टेट पार्टनरसिप प्रोग्राम (एसपीपी) सम्झौताका लागि दबाब दिदै आएको छ ।
यो दबाब आज आएर उसले दिएको होइन । उसले निरन्तर सात बर्ष देखि दबाब दिदै आएको छ । एमसीसी पास गरेसँगै अब यो सम्झौता गराउन साम्राज्यवादले नेपालको सरकार र सेनालाई तीब्र दबाब दिइरहेको छ । राष्ट्रघातमा केपी ओली जस्तै नाम लेखाउदै आएका वर्तमान प्रधानमन्त्री शेरबहादुर देउवा यसका लागि सहमत समेत भइसकेका छन् । उनको भम्रण समेत तय भइसकेको अवस्था छ । नेपाली सेनालाई पनि सहमत गराउने अनवरत प्रयास यिनै राष्ट्रघाती टोलीबाट भइरहेको छ ।
अमेरिकाले नेपालमा आफ्नो सेना यही तैनाथ गरेर चीनका विरुद्ध गतिविधि गर्ने र नेपालीलाई रणमैदान बनाउन कुत्सित प्रयास गरिरहेको छ । यतिबेला उसले नेपालमा आफ्ना दलाल भरौटेहरु समेत पाएको स्थिति छ । मित्रराष्ट्र चीनका विरुद्ध आक्रमण गर्दा नेपाली सेनालाई समेत आफ्नो सुरक्षा ढालभित्र राखेर प्रयोग गर्ने गरी अमेरिकाले एसपीपी सम्झौता गराउन खोजेको देखिन्छ । यसले नेपाल अमेरिकाको उपनिवेश बन्न पुग्नेछ । अझ एसपीपी सम्झौताले साम्राज्यवादी दाह्रा नंग्रा गाड्न उसलाई सहज बनाइदिनेछ ।
नेपाल सरकार र अमेरिकाको नेशनल गार्डबीच एसपीपी गर्नको लागि अमेरिकाले १० बुँदे समझदारी पत्र बनाएको हो । उक्त सम्झौता नेपालको रक्षा मन्त्रालय र अमेरिकाको पनि रक्षा मन्त्रालयमार्फत हुने उल्लेख छ । अमेरिकाले नेपाललाई सन् २०१५ मा एसपीपीका लागि निरन्तर दबाब दिदै आएको देखिन्छ । त्यसैले पछिल्लो परिस्थिति अनुसार एमसीसी जस्तो राष्ट्रघात गर्ने दलाल संसदीय दलाल समुहबाट अब देश बचाउन सकिदैन् । त्यसका लागि नागरिकले दलाल ब्यवस्थाका अनेक समुह त्यागेर सडकमा आउनु आजको आवश्यकता भएको छ । अब पार्टी भन्दा माथि उठ्ने बेला भयो । त्यसैले सबै देशभक्तहरुले राष्ट्रिय स्वाधीनताको लडाई लड्न अब ढिलाई गर्नुहुदैन ।
सम्पादकीय विचार बर्दघाट पोष्ट २०७९ असार १ गते