धनगढीः कैलालीमा १३ स्थानीय तह र एक सय २६ वडा छन्। जिल्लामा ६ सय ५६ पदका लागि स्थानीय तह निर्वाचन हुनेछ। नेपाली काँग्रेस, माओवादी केन्द्र, एकीकृत सामाजवादी, जनता समाजवादी र राष्ट्रिय जनमोर्चाले जिल्लामा निर्वाचनका लागि गठबन्धन गर्ने निर्णय गरेका छन्।
तर दलहरुका अ–आफ्ना अडानका कारण गठबन्धन गर्न सहज भने छैन। गठबन्धनका लागि सुदूरपश्चिम सरकारमा भाग पाउनुपर्ने नेपाली काँग्रेसको पहिलो शर्त छ। काँग्रेस कैलालीका सभापति नारायणदत्त भट्टले प्रदेश सरकारमा काँग्रेसको सहभागिता हुनुपर्ने बताए। ‘गठबन्धनमा जाने त निश्चित हो तर खास कुरा भएको छैन,’ उनले भने, ‘अनौपचारिचक छलफल भइरहेको छ। तर कसरी जाने कुरा भएको छैन।’
०७४ को निर्वाचनमा कैलालीको गोदावरी, गौरीगंगा, घोडाघोडी, टीकापुर, लम्कीचुहा, चुरे र मोहन्याल गाउँपालिका गरी ७ वटा पालिकामा नेकपा एमाले विजयी भएको थियो। मोहन्याल गाउँपालिकाका अध्यक्षको निधन भएपछि कार्यवाहक अध्यक्ष माओवादीमा प्रवेश गरेकी छिन्। माओवादी केन्द्र भजनी नगरपालिका र कैलारी गाउँपालिकामा विजयी भएको थियो। धनगढी, जोशीपुर र बर्दागोरियामा नेपाली काँग्रेस विजयी भएको थियो भने जानकी गाउँपालिकामा फोरमका उम्मेदवार विजयी भएका थिए। अहिले फोरमले नेपाली काँग्रेससंग एकता गरिसकेको छ।
‘गठबन्धन गर्ने सहमति भएको छ,’ उनले भने, ‘प्राविधिक विषयमा शुक्रबारदेखि छलफल सुरु हुन्छ। केन्द्रबाट पनि वडासम्म पाँच दलिय गठबन्धनको निर्देशन छ। हामीलाई पनि यस्तै सर्कुलर छ। वडा तहसम्म जाने हाम्रो छलफल हुँदैछ।’ गठबन्धनमै रहेका जनमोर्चा र जसपाले पनि वडाध्यक्षमा दाबी गर्दै आएका छन्। काँग्रेस र माओवादीले ०७४ को निर्वाचनमा जितेका पालिकामा प्रमुख पाउने र एमाले जितेको पालिकामा सबैभन्दा बढी समाजवादीलाई दिने गरी सिट बाँडफाँट हुने चर्चा छ। dienshkhabar