भवनलाई समयमा नै सम्पन्न गर्न सबैले जिम्मेवारपूर्वक काम गरौ, यो महत्वपूर्ण आयोजना हो, शहरी विकास मन्त्रालयले नेपाली सेनासँग समन्वय गरेर काम गर्ने अवस्था सृजना भएको छ,उहाँले भन्नुभयो । सरकारी निकायहरुबीच समन्वयका अभाव रहेको उल्लेख गर्दै मन्त्री झाँक्रीले सबै पक्षसँग समन्वय गरेर काम गर्नुपर्नेमा जोड दिनुभयो ।
शहरी विकास मन्त्रालयका सचिव मणिराम गेलालले चण्डी दल गणको नयाँ भवन आगामी २२ महिनाभित्र नै सम्पन्न हुने बताउनुभयो । शहरी विकास मन्त्रालय विभाग र आयोजनाबाट निर्माण व्यवसायीलाई पूर्ण रुपमा सहयोग हुने बताउदै उहाँले गुणस्तरीय ढंगले नयाँ भवन तोकिएकै समयभित्र सम्पन्न गर्न आग्रह गर्नुभयो ।
त्यसैगरी रक्षा सचिव किरणराज शर्मा सुरक्षा विना विकास र शान्ति प्राप्त नहुने भएकाले समग्र सिंहदरवारको सुरक्षाको लागि चण्डी दल गणको नयाँ भवन निर्माण हुन सुखद विषय भएको बताउनुभयो । भुकम्पबाट पीडित नेपाली सेनाका जवानहरु अहिले रक्षा मन्त्रालयको छिडीमा बसिरहेको र समयमा नै नयाँ भवन निर्माण भएपछि बस्नको लागि सहज हुने उहाँले बताउनुभयो । देशको रक्षा गर्ने संस्थाको फाउण्डर पिलर बसोबास हो, शहरी विकास मन्त्रालयले उच्च प्राथमिकता दिएर भवन निर्माणको काम अगाडि बढाएको छ, समयमा नै सम्पन्न होस, शर्माले भन्नुभयो ।
शहरी विकास तथा भवन निर्माण विभागका महानिर्देशक पद्म कुमार मैनालीले २०८० साल पुस २५ गतेसम्म समय रहेपनि त्यस भन्दा अघि नै भवन निर्माण हुने विश्वास व्यक्त गर्नुभयो । विभागको तर्फबाट निर्माणको क्रममा गर्नुपर्ने निर्णय समयमा नै हुने बताउदै मैनालीले समयमा सम्पन्न हुनेमा विभाग प्रतिबद्ध रहेकोजस्तै अरु स्टेक होल्डर पनि प्रतिबद्ध हुन जरुरी रहेको बताउनुभयो । नेपाली सेनासँग नयाँ भवन संहिताको बारेमा टेक्निकल कुरामा पनि सहकार्य गर्न तयार रहेको बताउदै उहाँले राष्ट्रिय भवन संहिता २०६० को कार्यान्वयन गर्ने निकाय पनि मन्त्रालय अन्तर्गतको विभाग रहेको बताउनुभयो । नयाँ भवन समयमा नै सम्पन्न गर्न समय–समयमा अनुगमन गरेर आवश्यक समन्वय र निर्देशन दिने काम विभागले गर्छ, उहाँले भन्नुभयो ।
विशेष भवन निर्माण आयोजना समन्वय कार्यालयका आयोजना निर्देशक दीलिपशेखर श्रेष्ठले निर्माण हुन लागेको पाँच तले नयाँ भवनमा ७०२ जना नेपाली सेनाका जवान बस्ने गरी डिजाइन गरिएको बताउनुभयो । नेपाली सेनालाई आवश्यक पर्ने सम्पूर्ण पूर्वाधार सहित डिजाइन गरिएको उल्लेख गर्दै उहाँले ४३ रोपनी ६ आना क्षेत्रफल मध्ये १० प्रतिशत भवन र बाँकी खुला क्षेत्रको रुपमा रहने जानकारी दिनुभयो । भवनलाई आधुनिक र प्रविधिमैत्री रुपमा निर्माण गर्न लागिएको बताउदै श्रेष्ठले समयसीमाभित्र नै सम्पन्न गर्न आयोजनाले विशेष ध्यान दिने बताउनुभयो । भवन निर्माणमा कुनै समस्या नआउने बताउदै उहाँले नयाँ भवन निर्माण सम्पन्न भएपछि नेपाली सेनालाई सहज हुने बताउनुभयो ।
भवन निर्माणको जिम्मेवारी संघीय संसद भवन निर्माणको जिम्मेवारी पाएको टुन्ड्री निर्माण सेवाले पाएको छ । टुन्ड्री÷रसुवा÷बिकोइ जेभीका आधिकारिक प्रतिनिधि सुमन सुवेदीले नयाँ भवन समयसीमा नै निर्माण गरिने बताउनुभयो । संघीय संसद भवनमा निर्माण गरिएको नयाँ टेक्नोलोजी प्रयोग गरेर चण्डी दल गणको भवन निर्माण गरिने बताउदै समयसीमा भित्र नै सम्पन्न गरेर हस्तान्तरण गरिने बताउनुभयो । विभाग र निर्माण व्यवसायीबीच भवन निर्माणको लागि ६५ करोड ९५ लाख २४ हजारमा ठेक्का सम्झौता भएको छ ।news of nepal