सडकमा रहेको मेडियन जथाभावी काट्ने र पैदल यात्रुका लागि बनाएको ठाउँमा मोटरसाइकल, अटोरिक्सा, ट्रयाक्टर र ट्रक लगायतका साना र ठूला सवारीले मनलाग्दी सडक काट्ने गरेकोले दुर्घटनाको जोखिम बढेको धनगढीका रोशन पन्तले दिनेशखबरलाई बताए। ‘६ लेन सडकमा जथाभावी गाडी चलाउने, लेन अनुशासन पालना नगर्ने प्रवृत्ति बढेको छ,’ उनले भने, ‘मेडियनमा जहाँ पायो त्यहाँबाट सडक काट्ने गरिएको छ। जसले दुर्घटनाको जोखिम बढेको छ।’
सडकमा ट्राफिक व्यवस्थापन गर्ने जिम्मेवारी ट्राफिक प्रहरीको हो। तर ६ लेन सडकमा ट्राफिक व्यवस्थापन गर्न प्रहरीले ध्यान नदिएको सर्वसाधारणले गुनासो गरेका छन्। ६ लेनको निर्माण कार्य सम्पन्न नभएको, सडकमा ट्राफिक चिन्ह राख्ने काम नभएकोले प्रहरीले ट्राफिक नियम कडाइका साथ पालन गराउन समस्या भएको जिल्ला ट्राफिक प्रहरी कार्यालय कैलालीका प्रमुख वकिलबहादुर सिंहले दिनेशखबरलाई बताए। ‘६ लेन सडकमा ट्राफिक चिन्ह राख्ने काम भएको छैन,’ उनले भने, ‘ट्राफिक चिन्ह नै नभएकोले नियम पालना गराउन हामीलाई पनि समस्या हुने गरेको छ।’
६ लेन सडकको मेडियनमा जहाँ पायो त्यहाँबाट लेन वारपार गर्ने गरिएको छ। डिके आयलदेखि ट्राफिक चौराहासम्म मात्रै दर्जनबढी ठाउँमा मेडियनमा गाडी चढाएर सडक काट्ने गरिएको छ। ट्राफिक प्रहरीले सडक प्रयोग चिन्ह नराख्दा नियम पालन गराउन समस्या भएको बताए पनि ६ लेन सडक योजना कार्यालयले भने अझै सडक निर्माणको काम नसकिएकोले ट्राफिक चिन्ह राख्न बाँकी रहेको जनाएको छ। ६ लेन सडक योजना कार्यालयका निमित्त प्रमुख सिद्धराज पाण्डेले भने, ‘सडक निर्माणको काम अझैं सकिएको छैन। ट्राफिक सूचना र संकेत राख्ने कामका लागि भने ठेक्का भइसकेको छ।’
६ लेन सडक निर्माणको काम बाँकी रहेको भनिए पनि हिजोआज सडक क्षेत्रमा कुनै पनि काम नभइरहेको सर्वसाधारणले बताएका छन्। मेडियनमा भने जथाभावी गाडी चढाउँदा भत्किन लागेको छ।dineshkhabar