बुटवल । रूपन्देही प्रहरीले आफ्नो जिल्लामा कृषि तथा पशु उपचारमा प्रयोग हुने कीटनाशक विषादी बेचबिखनमाकडाई गरेको छ।यसक्रममा प्रहरीले रूपन्देहीमा विषादी बेचबिखन गरिरहेका १०७ वटा कृषि र पशुजन्य क्लिनिक, एग्रोभेट, केन्द्र र भेटरीनरीलाई अभिलेख राख्न निर्देशन दिएको छ।
ती केन्द्रमा विषादी बेचबिखनको मासिक तथ्यांक राख्न र किसानको पहिचान गरेर मात्रै बिक्री-वितरण गर्न प्रहरीले निर्देशन दिएको छ।जिल्लामा आत्महत्या गर्ने व्यक्तिहरूको तथ्यांक बढेको, त्यसमा कृषि र पशुजन्य उपचारमा प्रयोग हुने विषादी सेवन उच्च देखिएकाले कडाइ थालिएको प्रहरी उपरीक्षक मनोज केसीले बताए।उनका अनुसार ९ वटा इलाका प्रहरी कार्यालय, दुई वटा वडा प्रहरी कार्यालय र एउटा प्रहरी चौकी अन्तर्गत रहेका १०७ वटा विषादी बेचबिखनका क्लिनिक, एग्रोभेट र भेटरीनगरी पत्ता लागेका छन्।
‘ती ठाउँमा प्रयोगको कारण देखाएर मात्र विषादी बिक्री गर्न निर्देशन दिइएको छ, त्यसको मासिक विवरण प्रहरीलाई उपलब्ध गराउन भनिएको छ,’ केसीले भने, ‘यो भए-नभएकोबारे प्रहरीले नियमित अनुगमन गर्छ।’
केसीका अनुसार चालू आर्थिक वर्षको साउन र भदौ महिनामा रूपन्देहीमा ९९ जना व्यक्तिहरूले आत्महत्या गरेका छन्। जसमा मुख्य रूपमा आल्मुनियम फोस्फेट, ओप-एल्पाइन र साइपभिटामिन बी कम्प्लेक्सलगायतका विषादी प्रयोग भएको देखिएको उनले बताए।
‘असम्बन्धित व्यक्तिलाई विषादी बेचबिखन गर्ने र त्यो विषादी आत्महत्याका लागि प्रयोग हुने गरेको पाइएपछि कडाइ गर्न थालिएको हो,’ उनले भने।रूपन्देही प्रहरीले आत्महत्या न्यूनीकरण कार्ययोजना (थ्री सर्कल) अवधारणा ल्याएको छ। सो अवधारणा कार्यान्वयन गर्ने क्रममा विषादी बेचबिखन गर्ने ठाउँहरूलाई लक्षित गरिएको केसीले बताए।‘यो अवधारणामा भारतबाट ल्याइने विषादी र ती विषादी कहाँ कसरी प्रयोग हुन्छन् भन्ने अनुगमन पनि गरिरहेका छौं,’ केसीले भने।,,Globalawaj