नवलपरासी/ ३० साउन ।
पश्चिम नवलपरासीको बर्दघाटमा आज शनिवार बेपत्ता भएका तीन किशोरीहरु भेटिएका छन्। बर्दिया जिल्लाको ठाकुरबाबा नगरपालिकाबाट शुक्रबार बेपत्ता भएका तिन वटै किशोरीहरु आज शनिवार नवलपरासी पश्चिमको बर्दघाटमा भेटिएका छन ।
नेपालगन्ज देखी काठमाण्डौ जाने क्रममा ना ६ ख ८४४२ नम्बरको बसमा सवार ठाकुरबाबा नगरपालिका ९ का तीन किशोरीहरु सावित्री बराइली, यमुना परियार र अनिता पुन मगरलाई चिनेर बसका चालक कैलाशराम सुनारले ईलाका प्रहरी कार्यालय बर्दघाटमा बुझाएका छन ।
किशोरीहरु हराएको भन्दै उनीहरुका परिवारले अस्थायी प्रहरी पोष्ट ठाकुरद्वारमा खोजी गरिदिनका लागि निवेदन दिएका थिए । सावित्रीका दाजु पूर्णबहादुर बराईलीले प्रहरीमा दिएको निवेदनमा तीन किशोरीहरु शुक्रबार बिहानदेखि सम्पर्क विहिन भएको उल्लेख गरिएको थियो ।
उनिहरुलाई प्रहरीले खोजी गरिरहेको अवस्थामा शनिबार बर्दघाटमा फेला पारिएको र उनिहरु प्रिवारको सम्पर्कमा आइसकेकाले निजका परिवारलाई बुझीलिन प्रहरीले आग्रह गरेको र निजको परिवार आएपछी ती किशोरीहरुलाई बुझाइने जिल्ला प्रहरी कार्यालय नवलपरासीले जनाएको छ ।