काठमाडौं, चैत २७ । वसन्तऋतुमा सगरमाथा आरोहण गर्ने आरोहीबाट २४ करोड ७७ लाख रुपैयाँ राजश्व संकलन भएको छ । विश्वको सर्वोच्च शिखर आरोहणमा विदेशी आरोहीहरुबाट सलामी रकम वापत सो रकम संकलन भएको पर्यटन विभागले जनाएको छ ।
विभागको विहिबारसम्मको तथ्याङक अनुसार नौ वटा हिमालबाट मात्रै २७ करोड ५२ लाख रुपैयाँ राजश्व संकलन भएको छ । यसमा सबै भन्दा धेरै सगरमाथाबाट राजश्व संकलनभएको छ भने त्यस पछि अन्नपुर्ण हिमालबाट ९१ लाख ६७ हजार र ल्होत्से हिमालबाट ८१ लाख ८६ हजार रहेको छ । सगरमाथा आरोहण गर्न एकजना विदेशी आरोहीले ११ हजार अमेरिकी डलर बुझाउनु पर्ने व्यवस्था छ । दुई वर्ष अघिको तुलनामा यस वर्ष आरोहीको संख्या बृद्धि भएको तथ्याङ्कले देखाएको छ ।
सरकारले पहिचान गरी आरोहणका लागि खुल्ला गरेको ४१४ वटा हिमालमध्ये ४०३ वटा हिमालबाट राजश्व संकलनगर्ने गरेको छ । यस वाहेक ११ वटा हिमाल भने पाँच हजार सात सय मिटरभन्दा होचो भएका कारण आरोहण निःशुल्कहुने गरेको छ । सरकारले पाँच हजार सात सय मिटर भन्दा होचा हिमाललाई पदयात्रा हिमालको रुपमा नामाकरण गरी आरोहण निःशुल्कगरेको हो । यि बाहेक २७ वटा साना हिमालबाट नेपाल पर्वतारोहण संघले राजश्व संकलन गर्दै आएको छ ।
Gorkha patra