पुस १८ ,गुल्मी – गुल्मी दरवार गाउँपालिकाले बाँझो जग्गाको उपयोग बढाउने रचनात्मक कामको सुरुवात गरेको छ। सामुहिक खेती कार्यक्रमलाई प्रोत्साहन गरिरहेको गाउँपालिकाले बाँझो जग्गाको लगत संकलन गरिरहेको छ। अहिलेसम्म साढे ३ सय रोपनी बाँझो जग्गा भूमि बैंकमा दर्ता गरिएको गाउँपालिकाका प्रमुख प्रशासकीय अधिकृत लक्ष्मण पाण्डेयले जानकारी दिए। भूमि बैंकमा करिव ६ सय रोपनी जग्गाको लागि निवेदन परेको छ।
ति निवेदन मध्ये कार्यविधीमा उल्लेख सवै प्रक्रिया पुरा गरेका साढे ३ सय रोपनी बाँझो जग्गा भूमि बैंकमा दर्ता भएको पाण्डेयले बताए। गाउँपालिकामा करिव ११ सय रोपनी जमिन बाँझो छ । त्यो मध्ये करिव ७ सय रोपनी जग्गा भूमि बैंकमा दर्ता हुने अपेक्षा गाउँपालिकाको गरेको छ।
गुल्मीको गुल्मीदरवार गाउँपालिकाले खेतियोग्य जग्गा बाँझो राख्ने व्यक्तिको सवै सेवा सुविधा रोक्का गर्ने निर्णय समेत गरेको छ। गाउँपालिकाले ‘भूमि सम्बन्धि कार्यविधी’ २०७७ राजपत्रका प्रकाशित गरिसकेको छ। कार्यविधी अनुसार आफ्नो बाँझो जनिमका बारेमा अनिवार्य गाउँपालिकालाई जानकारी गराउनुपर्ने व्यावस्था छ।
पाण्डेयले गाउँपालिकाले लगत संकलन गरिरहेकाले आफ्नो बाँझो जग्गाको बारेमा प्रक्रिया अनुसार निवेदन दिन सार्वजनिक सूचनाहरु प्रकाशन तथा प्रशासरण गरिरहेकोले छिटोभन्दा छिटो गाउँपालिकमा आएर लगत दर्ता गर्न सवैलाई आग्रह गरे। भूमि बैक स्थापना गरेर बाँझो जमिनको लगत संकलन भइरहेकोले अटेर गर्नेहरुलाई जरिवाना समेत गरेर गाउँपालिकाबाट प्रदान हुने सवै सुविधा रोक्का गरिने प्रमुख प्रशासकीय अधिकृत पाण्डेयले जानकारी दिए।
गुल्मीदरबार गाउँपालिकाले हरेक वडामा बाँझो जमिनको लगत संकलन गरिरहेको छ। गाउँपालिकामा कोरोना संक्रमणको कारण रोजगार गुमाएर परदेशबाट ४ सय ५२ युवा घर फर्केका छन्। त्यस्ता युवाहरुलाई कृषिमा आत्मनिर्भर बनाउनका गाउँपालिकाले कृषिका आर्कषक योजनाहरु अगाडी बढाएको गाउँपालिका प्रमुख अशोककुमार थापाले जानकारी दिए। बाँझो जमिनको उपयोग गर्न गाउँपालिकले अहिले पनि सामूहिक खेती कार्यक्रमलाई प्रोत्साहन गरिरहेको छ।
यो कार्यक्रममा रोजगारी गुमाएका युवाहरुलाई पहिलो प्राथमिकता दिइएको थापाले बताए। बाँझो राखिएको खेतियोग्य जमिनको उपयोग गरि कम्तीमा ३ रोपनीमा कृषि खेति गर्न चाहेका युवालाई प्रति रोपनीका दरले कार्यपालिकाले तोके अनुसार रकम नगद अनुदान उपलब्ध गराउने, जग्गा धनीले जग्गा उपयोय गर्न नसकेको मानसिव कारणसहित गाउँपालिकालाई ३ बर्षलाई जग्गा भाडामा दिनुपर्ने कार्यविधीमा उल्लेख छ।
त्यस्तै भूमि बैंकमा संकलन भएको जग्गा गाउँपालिकाले कृषि र पशुपालन गर्न इच्छुक व्यक्तिलाई निशुल्क प्रदान गर्नेछ। भने उपलब्ध गराएको जग्गाको हकमा आवश्यक मल, बिउ र प्राविधिक सहयोग पनि गाउँपालिकाले गर्नेछ। पहिलो पटक जग्गाको उपयोग गर्दा आवश्यक पर्ने गोरु अथवा ट्याक्टर उपलब्ध गराउन गाउँपालिकाले अनुदान दिने, कृषकले उत्पादन गरेका कृषि उपज बिक्री नभएको खण्डमा उचित मुल्यमा बिक्री वितरण गर्ने र गाउँपालिकाले आफ्नो कोशेली घरमा ल्याउने व्यावस्था गर्ने गाउँपालिकाले जनाएको छ ।
लुम्बिनि टाईम्स