८ मंसिर ,पोखरा– राष्ट्रिय गौरबको पुष्पलाल मध्यपहाडी लोकमार्ग निर्माणको कामले पूर्णता नपाउँदै भत्किन शुरु गरेको छ ।
आ.व. २०६४/६५बाट शुरु गरिएको बहुचर्चित लोकमार्गको अधिकांश ठाउँमा पुल निर्माण नहुँदा र कतिपय निर्माण कम्पनीको ढिलासुस्तीले आयोजनाको कामले गति लिन सकेको छैन ।पाँचथर जिल्लाको पूर्वी भेगमा पर्ने चियोभञ्ज्याङबाट बैतडी जिल्लाको झुलाघाट जोड्ने पूर्वपश्चिम महेन्द्र राजमार्गको बैकल्पिक मानिएको मध्यपहाडी लोकमार्गका अधिकांश पुल निर्माण कार्य अलपत्र छ । बाग्गुङसहित अधिकांश जिल्लाका कामहरु पूरा हुन सकेका छैनन् ।
आयोजनाकाअनुसार पोखरा– बाग्लुङ हुँदै पश्चिममा मुसिकोट रुकुमकोट चौरजहारीदेखि बैतडीको झुलाघाटसम्म जोडिने यो लोकमार्गको अहिलेसम्म ६७ वटा पुल निर्माण भएको छ । यो आयोजनाअन्तर्गतका अरु ६२ वटा पुल निर्माण कार्य बाँकी नै छ ।
यो मार्ग पश्चिमको बाग्लुङ–बुर्तिवाङ, बुर्तिवाङ–मुसिकोट, मुसिकोट–रुकुमकोट–चौरजहारी, चौरजहारी–दैलेख, दैलेख–दुल्लु–लैनचौर, लैनचौर–सतला–सैजुला, सैजुला–बेलखेत–मंगलसेन, मंगलसेन–सिलगडी, सिलगडी–स्याउले, स्याउले–सतबाँझ र सतबाँझ हुँदै बैतडीको झुलाघाटसम्म जोडिनेछ ।लोकमार्गले बाग्लुङपूर्व कास्की, लमजुङ, गोरखा, धादिङ, नुवाकोट तथा पूर्वका पाँचथर, तेह्रथुम, धनकुटा, भोजपुर, खोटाङ, ओखलढुंगा, उदयपुर, सिन्धुली, काभ्रे र सिन्धुपाल्चोकलाई पनि समेट्ने छ ।
वि.स. ०७६ सालसम्म निर्माण सम्पन्न गरिसक्नुपर्ने १ हजार ७ सय ६५ किलोमिटर लामो लोकमार्गको काम ठाउँ ठाउँमा अलपत्र छ । पछिल्लो समय कोरोना संक्रमणका कारण भएका लकडाउनले गर्दा कामअघि बढाउन नसकिएको निर्माण कम्पनीहरुले जनाएका छन् ।
१ सय ४१ किलोमिटर पर्ने बाग्लुङ खण्डमा अझै ४२ किलोमिटर सडक कालोपत्र गर्न बाँकी छ भने वर्षाको समयमा विभिन्न ठाउँमा पहिरो गएर सडक भत्किने क्रम पनि उस्तै छ ।यो आयोजनाको कुल लम्बाइ १ हजार ८ सय ७९ किलोमिटरमध्ये आठ सय दुई किलोमिटर सडक सम्पन्न भएको छ । एक हजार किलोमिटर यसअघिकै पुराना सडकहरु भएर पनि समयमै पूरा हुन नसकेको यो आयोजनाले निर्माण सम्पन्न गर्नुपर्ने दुई वर्ष अवधि पार गरिसकेको छ ।
१२ वर्षअघि शुरु गर्दा ३३ अर्ब ३६ करोड लागत अनुमान रहेको यो आयोजनाको पाँच वर्ष अवधि थप गरी लागत बढाएर ८४ अर्ब ३३ करोड पुर्याइएको छ ।
खबर हब