सांसद योगेश भट्टराइले काठमाडौंका अधिकांश विद्यालयमा पाठ्यपुस्तक नपुगेको भन्दै सरकारको ध्यानाकर्षण गराएका छन्। संसदमा बोल्दै सांसद भट्टराईले काठमाडौंकै स्कुलहरुमा ३० प्रतिशत पाठ्यपुस्तक नपुगेको बताएका हुन्।

उनले भने, ‘अहिले पनि कतिपय स्कुलमा ५० प्रतिशतभन्दा धेरै पाठ्यपुस्तक पुगेका छैनन्। काठमाडौंकै स्कुलहरुमा ३० प्रतिशत पाठ्यपुस्तक पुगेको छैनन्। ढुवानीको निम्ति सहज हुने स्थिति रहेको बागमति प्रदेशमा समेत झण्डै ४० प्रतिशत पाठ्यपुस्तक नपुगेको अवस्था छ भने कर्णालीको अवस्था के होला ? पाठ्यपुस्तक नहुँदा अधिकांश विद्यालयमा पढाइ सुरु भएको छैन। पाठ्यपुस्तक नहुँदा विद्यार्थीहरुले ‘बङ्क’ गरिरहेका छन्।’

शैक्षिक सत्र सुरु भएको एक महिना १३ दिन बितेको भन्दै जहिले पनि पाठ्यपुस्तकको समस्या झेलिरहेको बताए। उनले भने,‘कक्षा १ देखि ३ सम्मको पाठ्यपुस्तकको छपाइ निजी क्षेत्रबाट समेत हुँदै आएको छ। निजी क्षेत्रबाट छपाइ भएका पुस्तकहरु अधिकांश विद्यालयमा पुगेका छन्। ४ कक्षाभन्दा माथिको पाठ्यपुस्तक आजसम्म पनि विद्यालयमा पुगेका छैनन्।’ पाठ्यपुस्तक अभावले विद्यार्थीहरुमा लर्निङ लस भइरहेको बताए। उनले प्रथम त्रैमासिक परीक्षा नजिकिंदै गर्दासमेत पाठ्यपुस्तक नपुग्नु सरकारको लापरवाही रहेको बताए।  annapurnapost