धनगढी : सुदूरपश्चिम प्रदेश सरकारले चार वर्षमा तीन सय छ किलोमिटर सडक कालोपत्रे गरेको दाबी गरेको छ। प्रदेशको पूर्वाधार निर्माणमा यो नै सबैभन्दा ठूलो प्रगति रहेको प्रदेश सरकारले जनाएको छ।आर्थिक वर्ष २०७४/७५ मा १४ किलोमिटर, २०७५/०७६ मा शून्य, २०७६/७७ मा एक सय २२ र गत आर्थिक वर्षमा एक सय ६९ दशमलव ८ किलोमिटर सडक कालोगत्रे गरेको प्रदेश सरकारले जनाएको छ। यस्तै चार वर्षमा दुई सय ९५ किलोमिटर ग्राभेल सडक, एक हजार तीन सय २७ किलोमिटर कच्ची सडक, १० वटा सडक पुल र २८ झोलुङ्गे पुल निर्माण गरिएको भौतिक पूर्वाधार विकास मन्त्रालयका सूचना अधिकारी नरेश शर्माले बताए।
प्रदेशको भौतिक पूर्वाधार विकास मन्त्रालयको तथ्याँक अनुसार चार वर्षमा २ हजार चार सय ४४ घर जनता आवास आयोजनामार्फत निर्माण गरिएका छन्। तीन सय ७४ सरकारी तथा सामुदायिक भवनसहित पाँच एकीकृत आवास निर्माण गरिएका छन्। यो अवधि सम्ममा एक सय २२ किलोमिटर तट्बन्धन निर्माण गरेको छ भने तीन हजार एक सय ७० किलोमिटर जमिन उकासिएको छ।
प्रदेश सरकारले चार सय २८ वटा खानेपानीको योजना पूरा गरेको जनाएको छ। चार हजार १८० किलोमिटरमा पाइपलाइन जडान, एक हजार २२ इन्टेक, १०२ डिप ट्युबेल र ८३५ पानी पोखरी निर्माण गरिएको छ। एक हजार सात सय १९ किलोमिटर पक्कि कुलो, २ सय ७२ किलोमिटर कच्चि कुलो, ९ हजार ३७२ हेक्टरमा सतह सिँचाई, भूमिगत सिँचाइमार्फत २ हजार ४४० हेक्टर, नयाँ प्रविधिमार्फत ७४१ हेक्टर र ८ हजार ७ हेक्टरको सिँचाई पूर्वाधार पुनःनिर्माण गरिएको छ।
जलविद्युतमा भने अध्ययनको काम मात्र भएको छ। सूचना अधिकारी शर्माले १० मेगावाटभन्दा कमका जलविद्युत आयोजनाको डिपीआर तयार भएको बताए। प्रदेश सरकारले चार वर्षमा १० हजार ७४३ चार पांग्रे सवारी दर्ता गरेको छ। दुई पांग्रे सबैभन्दा बढी ५६ हजार ५७२ तथा तीन पाङ्ग्रे सात हजार ५२ दर्ता भएका छन्।dineshkhabar