बुटवल, १५ मङ्सिर। गौतमबुद्ध अन्तर्राष्ट्रिय विमानस्थल निर्माणको अन्तिम चरणमा रहेको रुपन्देहीमा यो जस्तै अन्य ठूला आयोजना पनि धमाधम निर्माण भइरहेका छन् । निर्माणको गति जारी रहँदा एकपछि अर्का ठूला आयोजना थपिने क्रम पनि जारी छ ।
पछिल्लो पटक, यो साता सुुरु भएका महìवाकाङ्क्षी ठूला आयोजना हुन्–तिनाउ दानव करिडोर र झुम्सा खानेपानी आयोजना । दुवै आयोजनाको अर्थमन्त्री विष्णुप्रसाद पौडेलले शिलान्यास गर्नुभएको हो । यसअघि रुपन्देहीमा बुटवल बेलहिया छ लेन सडक, अन्तर्राष्ट्रिय सम्मेलन केन्द्र तथा अन्तर्राष्ट्रिय प्रदर्शनीस्थल, बुटवल–नारायणघाट सडक, भैरहवा–लुम्बिनी–तौलिहवा सडक, बेलबास–बेथरी सडक, बुटवल कृषि उपज केन्द्र, मोतीपुर औद्योगिक क्षेत्रजस्ता अर्बौैं रुपियाँ लगानीका आयोजनाहरू निर्माण भइरहेका छन् । सङ्घीय बजेटका यस्ता आयोजनासँंगै प्रदेश र स्थानीय तहबाट पनि कयौँ विकास निर्माणका योजना सञ्चालनमा छन् ।
अर्थमन्त्री पौडेल भन्नुहुन्छ, “बुटवल–पश्चिम धानखोला सडक, बुटवल–पोखरा सडक विस्तार लगायतका थप आयोजना पनि थपिने छन् । बजेटको प्रबन्ध भइरहेको छ । स्रोतको अभाव हुनेछैन् ।” उहाँका भनाइमा बहुप्रतिक्षित सिद्धबाबा सुरुङ मार्गको काम पनि छिट्टै अगाडि बढ्नेछ । पछिल्लो पटक सुरु भएको तिनाउ दानव करिडोर चार अर्ब १३ करोडमा बन्न लागेको हो । नेपालले अङ्ग्रेज सेनालाई हराएको बुटवलको जितगढी किल्ला नजिक भएर भारतीय सीमा मर्चवार पुग्ने यो करिडोर ५० किलोमिटरको हुनेछ ।
आयोजनाका अनुसार बुटवल क्षेत्र भएर बग्ने तिनाउ र दानव नदीका दुवैतर्फका किनारै किनारमा करिडोर बन्नेछ । तिनाउ नदीमा ३५ किलोमिटर र दानव नदीमा १५ किलोमिटर गरी दुवैतर्फ दुई लेनको सडक निर्माण हुनेछ । त्यसका लागि पहिलो चरणमा तिनाउ नदीको साढे आठ र दानव नदीको साढे तीन किलोमिटरका लागि ठेक्का सम्झौता भइसकेको छ ।
सम्झौता अनुसार तिनाउ खण्डको ३६ महिना र दानव खण्डको २७ महिनामा सडक निर्माण सक्नुपर्नेछ । पहिलो चरणमा तिनाउतर्फको बुटवल नयाँ बसपार्कदेखि तिलोत्तमाको मगरघाटसम्म र दानवतर्फ बेलबास झोलुङ्गे पुलदेखि नयांँगाउंँ पुलसम्म करिडोर निर्माण हुनेछ । करिडोरमा आकर्षक विभिन्न अन्य संरचना पनि हुनेछन् ।
झुम्सा खानेपानी आयोजना जनघनत्व बढिरहेको बुटवलमा खानेपानीको दीर्घकालीन समाधानका लागि केन्द्रित छ । लामो समयको प्रतीक्षापछि छ अर्ब ३५ करोड ३५ लाख रुपियाँको यो आयोजना अघि बढेको हो । खानेपानी मन्त्रालयका सचिव माधव बेल्वासेका अनुसार यो आयोजनाले आगामी १५ वर्षपछिको बुटवलको मागलाई समेत सम्बोधन गर्नेछ ।
अहिले बुटवलमा दैनिक तीन करोड ४० लाख लिटर पानीको माग छ तर दुई करोड ८० लाख लिटर मात्र उत्पादन हुँदै आएको छ । तोकिएको मिति २०७९ सालमा यो आयोजना सम्पन्न भएमा बुटवलमा झुम्साबाट तीन करोड २० लाख लिटर पानी थपिनेछ । त्यतिबेला बुटवलमा करिब छ करोड लिटर पानी उत्पादन तथा वितरण हुनेछ । त्यति बेला बुटवलका सबै वडामा २४ सै घण्टा पानी उपलब्ध हुने खानेपानी संस्थानको दाबी छ ।
खानेपानी संस्थानका महाप्रबन्धक भूपेन्द्र प्रसादले पहिलो चरणमा झुम्सामा बाँध निर्माण गर्ने, ट्रस पुल बनाउने र पाइप बिछ्याएर पानी ल्याइने योजना रहेको बताउनुभयो ।
गोरखा पत्र