सुनवल ११ गते – सुनवल नगरपालिकाले १०० बेडको क्वारेन्टाईन निर्माण गरेको छ । वडा – ११ जर्गाहा स्थित एक चौरमा १०० बेडको सुविधा सम्पन्न क्वारेन्टाईन निर्माण गरिएको हो । उक्त क्वारेन्टाईनमा कोरोना आशंका गरिएको घर परिवार, सम्पर्कमा रहेका व्यक्तिहरु र संक्रमित देशबाट आएका व्यक्तिहरुलाई राखिने छ । क्वारेन्टाईनमा कोरोना संक्रमित देखिएमा उपचारका लागि प्रादेशिक र टेकु अस्पताल पठाईने जनाइएको छ । उक्त क्वारेन्टाईन बुधबार (१२ गते ) देखि संचालनमा आउने बताइएको छ । सुनवल नगरपालिकाको आर्थिक सहयोग तथा प्रहरी युक्ति तालिम महाविद्यालय जर्गाहाको प्राविधिक सहयोगमा मंगलवार विहानदेखि उक्त क्वारेन्टाईनको वार्डहरू निर्माण गरिएको थियो । सो स्थानमा बेड, विद्युत, खानेपानी, शौचालय सहित सुविधाहरुको व्यवस्थापन भएको सुनवल नगरपालिकाका नगर प्रमुख भिम बहादुर थापाक्षेत्रीले बताउनुभयो । विश्वभरि महामारीको रुपमा फैलिएको कोरोना भाईरस संक्रमणको जोखिमलाई मध्यनजर गर्दै पुर्वतयारीका लागि निर्माण भैरहेको उक्त क्वारेन्टाईनका लागि नेपाल प्रहरीको हेडक्वाटरबाट टेन्ट उपलब्ध भएको छ भने नगरपालिकाले बेड, स्वास्थ्यकर्मीलाई पिपिई र स्वास्थ्य परिक्षण सामाग्री उपलब्ध गराउने जनाएको छ । उक्त क्वारेन्टाईनमा बसेकाहरुको हेरचाहका लागि नगरपालिकाले विभिन्न स्वास्थ्य चौकीका स्वास्थ्यकर्मीहरुलाई खटाउने जनाएको छ । पूर्व तयारीका लागि जिल्लाका ७ वटै स्थानिय तहले आ–आफनो नगरक्षेत्रभित्र क्वारेन्टाईन बनाउने जिल्ला विपद व्यवस्थापन समितिको निर्णय अनुसार सो क्वारेन्टाईन निर्माण भएको हो ।
