नवलपरासी – अख्तियार दुरुपयोग अनुसन्धान आयोग बुटवलले विहीवार पश्चिम नवलपरासीको बर्दघाटमा रहेको राष्ट्रिय बाणिज्य बैक बर्दघाट शाखाका कनिष्ठ सहायक अञ्चल सुनारलाई १० हजार घुस सहित रंगेहात पक्राउ गरेको छ । सुनारलाई पूर्व राष्ट्रसेवक समेत रहेका सेवाग्राहीलाई ऋण लगानी प्रयोजनको लागि काम गर्ने क्रममा १० हजार घुस सहित रंगेहात पक्राउ हो ।
अख्तियार बुटवलका सुचना अधिकारी सुरेश भुसालका अनुसार सुनारले राष्ट्र सेवा कर्जा प्रवाह गरेपछि १० हजार रुपैया नबुझाई ऋण रकम निकाल्न नमिल्ने भन्दै घुस मागेका थिए । घुस रकम लिएर पुगेका सेवाग्राहीसंग रकम लिने क्रममै उनलाई रंगेहात पक्राउ गरिएको थियो । त्यस्तै अख्तियारको टोलीले बर्दघाट नगरपालिकामार्फत वडा नम्बर ४ का जनप्रतिनिधिसंग समेत आवश्यक समन्वय गरेको थियो । टोलीले बैकमा पुगेपछि सुरक्षा गार्डसंग एक्कासी शाखा प्रबन्धकको कार्यकक्ष कहाँ छ भनी प्रश्न गरेका थिए । कार्यकक्षमा शाखा प्रबन्धक नभेटिएपछि सो टोलीले सहायक प्रबन्धक सुजन मरहटटासंग सोधपुछ समेत गरेको प्रत्यक्षदर्शी एक सेवाग्राहीले बताए । त्यस्तै सुनारलाई विशेष अदालतमा मुद्दा दायर गरिने अख्तियार दुरुपयोग अनुसन्धान आयोग बुटवलका प्रमुख तारानाथ अधिकारीले बताउनु भयो । उहाँका अनुसार मुद्दा दर्ता भएपछि सेवाबाट निलम्बित हुने र मुद्दा प्रकृया अघि बढ्नेछ ।