पश्चिम नवलपरासी सहित देशैभर मगर एकता दिवस मनाईयो, पहिचान बिरोधीलाई चिन्नुपर्ने मगर मोर्चाको आब्हान

नवलपरासी १५ फागुन – पश्चिम नवलपरासी सहित देशैभरका मगर समुदायले मगर एकता दिवस मनाएका छन् । सोही क्रममा नेपाल मगर संघ बर्दघाट नगर समितिको आयोजनामा ३७ औँ मगर एकता दिवस मनाइएको छ । बुधवार बर्दघाटको हरियाली नगरमा आयोजित कार्यक्रममा नेपाल मगर संघ बर्दघाट नगर कमिटि अध्यक्ष पुर्ण बहादुर रानाको अध्यक्षता रहेको थियो । त्यस्तै कार्यक्रममा नेपाल मगर संघ केन्द्रिय कोषाध्यक्ष कमला थापाको प्रमुख आतिथ्यता एवं बर्दघाट नगर प्रमुख धिरज शर्मा बस्यालको विशिष्ट आतिथ्यता रहेको थियो ।
कार्यक्रममा बोल्दै प्रमुख अतिथि थापाले मगर जातिको पहिचान र अस्तित्वको लागी प्रदेश नम्बर ५ को नामाकरण मगरात थरुहट प्रदेश राखिनुपर्ने माग गर्दै मगरातहरुको सभ्यता बचाउन र विश्वलाई उक्त सभ्य चिनाउनका लागी उक्त माग राखिएको बताउनुभयो ।
सोही अवसरमा बोल्दै विशिष्ट अतिथि नगर प्रमुख बस्यालले बर्दघाट नगरपालिका भित्र सबै जाति, भाषा, धर्म र संस्कृतिलाई सरक्षण गर्नका लागी सक्दो सहयोग गर्ने बताउदै आदिवासी जनजातिहरुको सम्मानका लागी आदिवासी जनजाति संग्रहालय निर्माणको योजना अघि सारेको बताउनुभयो ।
कार्यक्रममा नेपाल मगर संघका जिल्ला अध्यक्ष डिवि थापा, निर्वतमान अध्यक्ष खिम बहादुर पुनल लगाएतले शुभकामना मन्तब्य ब्यक्त गर्नुभएको थियो । सो अवसरमा राष्ट्रिय स्तरका कलाकारहरु लोक गायक मिलन लामा, लोक गायिका शर्मिला गुरुंग, हास्यकलाकार परुषोत्तम भण्डारी पुर्खे बा लगायत स्थानिय कलाकारहरुको सांगितिक प्रस्तुती रहेको थियो । संघका नगर उपाध्यक्ष नर बहादुर थापाको स्वागत मन्तब्य रहेको कार्यक्रमको सञ्चालन सचिव मेहर सारु मगर र पिपला रानाले गर्नुभएको थियो । त्यस्तै, नेपाल मगर संघ विनयी त्रिबेणी वडा नम्बर ६ र ७ को सयुक्त आयोजनामा नेपाल मगर संघको स्थापना भएको ३९ औँ स्थापना दिवस विभिन्न मनोरजनात्मक कायक्रमका साथ मनाइएको छ । नेपाल मगर संघ विनयी त्रिबेणी ७ का अध्यक्ष दिपक आले मगरको अध्यक्षतामा कार्यक्रम सम्पन्न भएको हो । सो अवसरमा कार्यक्रमका प्रमुख अतिथि नेपाल मगर संघ गण्डकी प्रदेश सदस्य सिँह बहादुर थापा मगर रहनुभएको थियो ।
कार्यक्रममा विनयी त्रिबेणी गाउपालिका वडा नम्बर ७ का वडाध्यक्ष गोपाल बहादुर क्षेत्रीले सम्पुर्ण मगर समुदायलाई शुभकामना दिदै मगर अगुवाहरुबाट खेलिएको भुमिका प्रशंसनिय रहेको बताउनुभयो । कार्यक्रममा ज्योती गुम्बा विहार समतिका अध्यक्ष खेम बहादुर राना, नेपाल मगर संघ विनयी त्रिबेणीकी उपाध्यक्ष रुपा थापा मगर, जम्मा प्रसाद पल्ली मगर, विष्णु कुमार श्रेष्ठ, पत्रकार आरपी उपाध्याय लागएतका वक्ताहरुले शुभकामना मन्तब्य ब्यक्त गर्नुभएको थियो । त्यस्तै, मगर दिवसको अवसरमा पुर्वी नवलपरासीका गैँडाकोट , देवचुली कावासोती लगायत बिभिन्न स्थानमा जनचेतनामुलक तथा साँस्कृतिक कार्यक्रम भएका छन् ।
को पहिचानबिरोधी हो अब मगर समुदायले चिन्नुपर्छ – मगर मोर्चा
त्यस्तै अखिल नेपाल मगर राष्टिय मुक्ति मोर्चा पश्चिम नवलपरासीले मंगलवार एक बिज्ञप्ति जारी गर्दै पहिचानका लागि सबै मगर समुदाय एकताबद्ध हुन आब्हान गरेको छ । मोर्चाका जिल्ला संयोजक गोबिन्द बहादुर साठीघरे मगरद्धारा जारी बिज्ञप्तिमा मगर समुदायलाई मगर दिवसले पहिचानवादी र गैरपहिचानवादी छुट्याउन र एकताबद्ध हुन प्रेरणा मिल्ने छ भनिएको छ । बिज्ञप्तिमा मगर समुदायको अधिकारका लागि संर्घषको बिकल्प नभएको भन्दै त्यसका लागि फुटेर नभई जुटेर अधिकार पाइने उल्लेख गरिएको छ । सो बिज्ञप्तिमा आदिवासी जनजातिका धेरै चाडपर्वहरुका बिदा कटौती गरिएको भन्दै मगर दिवसमा सार्वजनिक विदा दिनुपर्ने माग गरिएको छ ।