हाम्रा लेटरप्याड च्यात्ने मन्त्रीको मुख जनताले च्यात्न नपरोस्: झपट रावल

By स्थानीय पत्र Last updated Jun 13, 2022

प्रमुख प्रतिपक्षी नेकपा एमालेका सांसद झपटबहादुर रावलले जनताका माग समावेश गरिएका सांसदका लेटरप्याड मन्त्रीहरूले च्यात्ने गरेको आरोप लगाएका छन्।

आज प्रतिनिधि सभा बैठकमा बोल्दै उनले जनताका माग उल्लेख गरेर प्रतिपक्षी सांसदहरूले लेटरप्याडमा पठाए पनि त्यो च्यात्ने काम भएको दाबी गरेका थिए।

‘मैले भर्खरमात्र सुनेँ- केही केही मन्त्री यस्ता छन्, जनताका माग प्रतिपक्षका सांसदहरूले आफ्नो लेटरप्याडमा पठाउँदा प्रतिपक्षको भनेर गैरजिम्मेवार भएर अराजक ढंगले च्यातेको भन्ने आइरहेको छ।’

उनले अर्कोपटक संसदमा बोल्दा कुन मन्त्रीले लेटरप्याड च्यातेको हो भन्ने विस्तृत खुलाउने पनि बताए।

‘अर्को दिन त्यस्ता मन्त्रीहरूको विस्तृत विवरण लिएर यही सदनमा भण्डाफोर गर्ने वाचा गर्न चाहन्छु,’ उनले भने, ‘अराजक मन्त्रीलाई जनताका तर्फबाट चुनौती दिन चाहन्छु- खबरदार हाम्रा लेटरप्याड च्यात्ने मन्त्रीहरू जनताले तपाईंका हात र मुख च्यात्न नपरोस् भन्ने कुरा खबरदारी गर्न चाहन्छु।’ setopati