देउवाले भने- यस्तो राम्रो काम गर्ने रेनुलाई हरायो भने जनताले के भन्लान्

By स्थानीय पत्र Last updated May 5, 2022

नेपाली कांग्रेसका सभापतिसमेत रहेका प्रधानमन्त्री शेरबहादुर देउवाले भरतपुर महानगरपालिकाको मेयरमा रेनु दाहाललाई जिताउन आग्रह गरेका छन्।

सत्तागठबन्धनका उम्मेदवार रेनु र उपमेयरमा चित्रसेनलाई जिताउन उनले आग्रह गरेका छन्।

आज चितवनमा भएको चुनावी सभामा बोल्दै उनले भने, ‘रेनुले यहाँ जितिसक्नुभएको छ। हाम्रो पार्टीले यहाँ बखेडा गर्नु आवश्यक छैन।’

उनले चुनावका लागि गठबन्धन आवश्यक परेको पनि बताए। उनले राम्रो काम गर्ने रेनुलाई फेरि मेयर जितायो भने अर्कोपटक कांग्रेसले मेयर पाउने पनि बताएका थिए।

‘गठबन्धन टुटाउने षड्यन्त्र भइरहेको छ। भरतपुरबाट गठबन्धन टुटाउन हुन्न। गठबन्धन टुट्यो भने हाम्रो पार्टी पनि खत्तम हुन्छ,’ देउवाले भने।

उनले प्रचण्ड सजिलो मानिस भएको पनि बताए। ‘प्रचण्ड सजिलो मानिस हुनुहुन्छ तपाईंहरूले चिन्नुभएकै छैन,’ उनले भने।

उनले रेनु दाहालले पाँच वर्ष मेयर भएर राम्रो काम गरेको बताए। ‘यस्तो राम्रो काम गर्ने रेनुलाई जिताएन भने के भन्लान् जनताले?,’ देउवाले प्रश्न गरे। setopati