अहिलेको पुस्तालाई रेडियोदेखि फिल्म लाग्ने क्यामरा, पुराना टेलिभिजन–फोन सेट, डेस्कटप कम्प्युटरका सीआरटी मोनिटर र फ्लपी डिस्कसम्म नौलो लाग्न सक्छन् । स्मार्टफोन र ट्याब्लेटका टचस्क्रिनमा औंला चलाउनेहरूलाई प्रविधि रूपान्तरणका चरण सुन्दा पनि रमाइलो कथाजस्तो लाग्न सक्छ ।

अहिले इमेल पठाउन–पाउन डेस्कटप वा ल्यापटप र फोटो खिच्न क्यामरा छुट्टै खोजिरहनु पर्दैन । गीत सुन्न वाक्मेन वा आइपोड चाहिँदैन । टेलिभिजन वा इन्टरनेटका साइटमा कुनै श्रव्यदृश्यको प्रत्यक्ष प्रसारणलाई भारी भरकम डिभाइस नचाहिने भएको छ । एउटा मोबाइल फोन सेट अथाह सुविधा छन् । अडियो–भिडियो संवाद गर्न, फोटो–भिडियो खिच्न, सम्पादन गर्न, क्यालकुलेटर, रेडियो, टर्चलाइट, कम्प्युटर, पेन ड्राइभ, हार्डडिस्क, जीपीएस आदि थुप्रै सुविधा मोबाइल फोनमै छ ।

हरेक कामका लागि जब छुट्टाछुट्टै डिभाइस चाहिने जमाना थियो, महँगो त थियो नै, सुलभ पनि थिएन । सबैको डिभाइसमा पहुँच सम्भ्रान्त वर्गलाई मात्र सहज थियो । एक दशकमै पनि प्रविधि विकासले धेरै ठूलो फड्को मारिसकेको छ ।

इतिहासको गर्भमा पुगिसकेका ती वस्तु अहिले संकलकहरूका लागि ‘एन्टिक पिस’ भएका छन् । अहिले पनि केही सौखिनहरू ‘आउटडेटेट डिभाइस’ प्रयोग गरिहेका छन् । तर त्यस्ता वस्तुहरू प्रयोग गर्न अहिले सहज छैन । भीसीआर भए पनि अहिले त्यसमा लाग्ने क्यासेट कहाँ पाउने ? टेपरेकर्डर त होला तर त्यसमा बजाउन नयाँ क्यासेट चक्का भेटिँदैन । केही ‘एन्टिक पिस’ अझै कतै कतै सौखका रूपमा राखेको देखिन्छ । तर प्रयोग हुन छाडेको छ ।

चाडपर्व, विवाह आदि विशेष उपलक्ष्यमा फोटो खिचाउन पाइन्थ्यो । त्यो पनि ठूलाका हातमा क्यामरा हुन्थ्यो र बडो जतनसाथ क्लिक गरिन्थ्यो । हरेक क्लिकको अर्थ हुन्थ्यो । सामान्यतया एउटा रिलबाट ३६ वटासम्म मात्रै फोटो खिच्न मिल्थ्यो । त्यो फोटो हेर्नका लागि रिल धुलाउन पठाउनुपर्थ्यो । अहिले मोबाइल हात हातमा छन्, फोटो जति खिचे पनि रिल सकिने चिन्ता लिनु पर्दैन । व्यावसायिक फोटोग्राफरका लागि क्यामरामा प्रविधिले ठूलो फड्को मार्दा अब ‘मिररलेस’ आइसकेको छ, जो पुरानो क्यामराका तुलनामा हलुका त छँदै छ, फोटो–भिडियोको गुणस्तर पनि अब्बल छ । घरका कुनै कुनामा थन्किएका ती ‘एन्टिक पिस’ हेर्नुस्, तपाईंलाई ‘नोस्टाल्जिक’ बनाउनेछ ।kantipurnews